ਜੇਕਰ ਤੁਹਾਨੂੰ ਇਹ ਚਿੰਤਾ ਹੈ ਕਿ ਸ਼ਾਇਦ ਤੁਹਾਡੇ ਬੱਚੇ ਨੂੰ COVID-19 ਹੈ, ਤਾਂ ਵਧੇਰੀ ਜਾਣਕਾਰੀ ਲਈ ਕ੍ਰਿਪਾ ਕਰਕੇ ਸਮਰਪਿਤ ਹਾਟਲਾਇਨ ਨੂੰ 1800 675 398 ਤੇ ਫੋਨ ਕਰੋ ਜਾਂ
https://www.health.gov.au/ ਵੈੱਬਸਾਈਟ ਵੇਖੋ।
ਕਈ ਮਾਪੇ ਇਸ ਸਲਾਹ ਦੀ ਭਾਲ ਕਰ ਰਹੇ ਹਨ ਕਿ ਕਰੋਨਾਵਾਇਰਸ ਦੀ ਮਹਾਮਾਰੀ ਦਾ ਸਾਮ੍ਹਣਾ ਕਰਨ ਵਿੱਚ ਉਹ ਆਪਣੇ ਬੱਚੇ ਦੀ ਸਰਬੋਤਮ ਤਰੀਕੇ ਨਾਲ ਸਹਾਇਤਾ ਕਿਵੇਂ ਕਰ ਸਕਦੇ ਹਨ। ਹਾਲਾਤਾਂ ਦੇ ਤੇਜ਼ੀ ਨਾਲ ਬਦਲਣ ਦੇ ਨਾਲ-ਨਾਲ, ਲੋਕਾਂ ਦੇ ਬੀਮਾਰ ਪੈਣ ਦੀ ਵਾਰ-ਵਾਰ ਖਬਰ ਆਣ ਕਰਕੇ, ਅਤੇ ਨਾਲ ਹੀ ਕਈ ਬੱਚਿਆਂ ਦਾ ਆਪਣੀਆਂ ਸਧਾਰਨ ਗਤੀਵਿਧੀਆਂ ਜਾਰੀ ਰੱਖਣ ਵਿੱਚ ਯੋਗ ਨਾ ਰਹਿਣ ਕਰਕੇ, ਇਹ ਪਰਿਵਾਰਾਂ ਲਈ ਇੱਕ ਬਹੁਤ ਬੇਚੈਨੀ ਵਾਲਾ ਸਮਾਂ ਹੈ। ਇਸ ਤੱਥ-ਪੱਤਰ ਵਿੱਚ ਮਾਪਿਆਂ ਅਤੇ ਦੇਖਰੇਖਕਰਤਾਵਾਂ ਲਈ ਕੁੱਝ ਜਾਣਕਾਰੀ ਸ਼ਾਮਿਲ ਹੈ ਤਾਂਜੋ ਇਸ ਚੁਣੌਤੀ-ਭਰੇ ਅਤੇ ਅਨਿਸ਼ਚਿਤ ਸਮੇਂ ਦੌਰਾਨ ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਦਾ ਸਮਰਥਨ ਕਰਨ ਵਿੱਚ ਮਦਦ ਅਤੇ ਸਵਾਲਾਂ ਦੇ ਜਵਾਬ ਮਿਲ ਸਕਣ।
ਆਪਣੇ ਬੱਚਿਆਂ ਨਾਲ ਕਰੋਨਾਵਾਇਰਸ ਬਾਰੇ ਗੱਲਬਾਤ ਕਰੋ (Talk about coronavirus with your children)
ਇਹ ਮਹਤਵਪੂਰਣ ਹੈ ਕਿ ਆਪਣੇ ਬੱਚਿਆਂ ਨਾਲ ਕਰੋਨਾਵਾਇਰਸ ਬਾਰੇ ਗੱਲਬਾਤ ਕਰਨ ਤੋਂ ਪਰਹੇਜ ਨਾ ਕੀਤਾ ਜਾਵੇ – ਇਸ ਵਿਸ਼ੇ ਤੇ ਗੱਲਬਾਤ ਕਰਨ ਤੋਂ ਪਰਹੇਜ ਕੀਤੇ ਜਾਣ ਕਰਕੇ ਉਹ ਵੱਧ ਚਿੰਤਿਤ ਹੋ ਸਕਦੇ ਹਨ ਅਤੇ ਉਨ੍ਹਾਂ ਨੂੰ ਇਸ ਬਾਰੇ ਅਨਿਸ਼ਚਿਤਤਾ ਹੋ ਸਕਦੀ ਹੈ ਕਿ ਕੀ ਹੋ ਰਿਹਾ ਹੈ। ਕਈ ਬੱਚਿਆਂ ਦੇ ਪਹਿਲਾਂ ਤੋਂ ਹੀ ਕਰੋਨਾਵਾਇਰਸ ਬਾਰੇ ਵਿਚਾਰ ਅਤੇ ਸੁਝਾਅ ਹੋਣਗੇ, ਇਸਲਈ ਉਨ੍ਹਾਂ ਨੂੰ ਜੋ ਪਤਾ ਹੈ ਉਸ ਬਾਰੇ ਪੁੱਛ ਕੇ ਗੱਲਬਾਤ ਦੀ ਸ਼ੁਰੂਆਤ ਕਰੋ। ਖੁੱਲ੍ਹੇ ਸਵਾਲ ਪੁੱਛੋ ਜਿਨ੍ਹਾਂ ਦਾ ਕੋਈ ਇੱਕ ਨਿਸ਼ਚਿਤ ਜਵਾਬ ਨਾ ਹੋਵੇ ਅਤੇ ਉਨ੍ਹਾਂ ਦੀ ਕਿਸੇ ਚਿੰਤਾ, ਡਰ ਜਾਂ ਜੇਕਰ ਉਨ੍ਹਾਂ ਨੇ ਕੋਈ ਝੂਠੀ ਜਾਣਕਾਰੀ ਸੁਣੀ ਹੈ, ਤਾਂ ਉਸਤੇ ਧਿਆਨ ਦਿਓ। ਬੱਚਿਆਂ ਨੂੰ ਇਹ ਦੱਸਣ ਵਿੱਚ ਕੋਈ ਬੁਰਾਈ ਨਹੀਂ ਹੈ ਕਿ ਸਾਡੇ ਕੋਲ ਸਾਰੇ ਜਵਾਬ ਨਹੀਂ ਹਨ ਪਰ ਜਦੋਂ ਸਾਨੂੰ ਹੋਰ ਪਤਾ ਚੱਲਗਾ ਤਾਂ ਅਸੀਂ ਉਹ ਜਾਣਕਾਰੀ ਉਨ੍ਹਾਂ ਨਾਲ ਸਾਂਝੀ ਕਰਾਂਗੇ।
ਸਪੱਸ਼ਟ ਅਤੇ ਇਮਾਨਦਾਰ ਰਹੋ, ਪਰ ਉਮਰ-ਮੁਤਾਬਕ ਜਾਣਕਾਰੀ ਦਿਓ (Be open and honest, but age-appropriate)
ਤੱਥਾਂ ਦੀ ਜਾਣਕਾਰੀ ਦਿਓ, ਪਰ ਆਪਣੇ ਬੱਚੇ ਨਾਲ ਜਾਣਕਾਰੀ ਸਾਂਝੀ ਕਰਦੇ ਸਮੇਂ ਉਸਦੀ ਉਮਰ ਨੂੰ ਧਿਆਨ ਵਿੱਚ ਰੱਖੋ। ਵੱਖ-ਵੱਖ ਉਮਰ ਦੇ ਬੱਚਿਆਂ ਨੂੰ ਵੱਖ-ਵੱਖ ਜਵਾਬ ਚਾਹੀਦੇ ਹੋਣਗੇ। ਛੋਟੇ ਬੱਚਿਆਂ ਨੂੰ ਸਧਾਰਨ ਅਤੇ ਸੱਪਸ਼ਟ ਜਾਣਕਾਰੀ ਦਿਓ ਅਤੇ ਵੱਡੇ ਬੱਚਿਆਂ ਅਤੇ ਤੇਰ੍ਹਾਂ ਤੋਂ ਉੱਨੀ ਸਾਲ ਦੇ ਬੱਚਿਆਂ ਲਈ ਵਧੇਰੇ ਵੇਰਵੇ ਵਾਲੀ ਜਾਣਕਾਰੀ ਦਿਓ।
ਬੱਚਿਆਂ ਨੂੰ ਇਹ ਯਾਦ ਦਿਲਾਉਣਾ ਮਹਤਵਪੂਰਣ ਹੁੰਦਾ ਹੈ ਕਿ ਹਾਲਾਂਕਿ ਉਹ ਵਾਇਰਸ ਨਾਲ ਪੀੜਿਤ ਹੋ ਸਕਦੇ ਹਨ, ਪਰ ਇਸਨਾਲ ਉਨ੍ਹਾਂ ਦੇ ਬਹੁਤ ਬੀਮਾਰ ਹੋਣ ਦੀ ਸੰਭਾਵਨਾ ਘੱਟ ਹੈ। ਉਨ੍ਹਾਂ ਨੂੰ ਦੱਸੋ ਕਿ ਜੇਕਰ ਉਹ ਇਸ ਕਰਕੇ ਬੀਮਾਰ ਪੈ ਜਾਂਦੇ ਹਨ ਤਾਂ ਇਹ ਬੀਮਾਰੀ ਉਨ੍ਹਾਂ ਨੂੰ ਸ਼ਾਇਦ ਪਹਿਲਾਂ ਹੋ ਚੁੱਕੇ ਜ਼ੁਕਾਮ ਵਾਂਗ ਹੀ ਹੋਵੇਗੀ। ਹੋ ਸਕਦਾ ਹੈ ਕਿ ਉਨ੍ਹਾਂ ਨੂੰ ਬੁਖਾਰ, ਖੰਘ, ਨੱਕ ਵੱਗਣ ਜਾਂ ਗਲੇ ਵਿੱਚ ਦਰਦ ਦੇ ਲੱਛਣ ਹੋਣ ਅਤੇ ਉਹ ਕੁੱਝ ਦਿਨਾਂ ਲਈ ਜਾਂ ਇੱਕ ਹਫਤੇ ਦੇ ਕਰੀਬ ਸਮੇਂ ਤਕ ਬੀਮਾਰ ਰਹਿਣ, ਅਤੇ ਉਹ ਠੀਕ ਹੋ ਜਾਣਗੇ। ਬੱਚਿਆਂ ਨੂੰ ਇਹ ਦੱਸਣ ਵਿੱਚ ਕੋਈ ਬੁਰਾਈ ਨਹੀਂ ਹੈ ਕਿ ਬਾਲਗਾਂ ਦੇ ਵਧੇਰੇ ਬੀਮਾਰ ਪੈਣ ਦੀ ਸੰਭਾਵਨਾ ਹੈ, ਖਾਸ ਕਰਕੇ ਜੇਕਰ ਉਹ ਬਜ਼ੁਰਗ ਹੋਣ ਜਾਂ ਉਨ੍ਹਾਂ ਨੂੰ ਕੋਈ ਮੈਡੀਕਲ ਸਮੱਸਿਆ ਹੋਵੇ। ਉਨ੍ਹਾਂ ਨੂੰ ਇਹ ਦੱਸੋ ਕਿ ਜਿਆਦਾਤਰ ਕਾਰਜਨੀਤੀਆਂ ਜਿਹੜੀਆਂ ਕਿ ਉਹ ਭਾਈਚਾਰੇ ਵਿੱਚ ਦੇਖਦੇ ਹਨ, ਜਿਵੇਂ ਕਿ ਹੱਥ ਧੋਣੇ ਅਤੇ ਸਮਾਜਕ ਦੂਰੀ, ਉਹ ਅਸਲ ਵਿੱਚ ਸਭ ਤੋਂ ਅਸੁਰੱਖਿਅਤ ਲੋਕਾਂ ਦੀ ਸੁਰੱਖਿਆ ਕਰਨ ਵਿੱਚ ਮਦਦ ਦੇਣ ਲਈ ਹਨ। ਇਹ ਕੰਮ ਕਰਕੇ ਉਹ ਦੂਜਿਆਂ ਦੀ ਸੁਰੱਖਿਆ ਕਰਨ ਵਿੱਚ ਮਦਦ ਦੇ ਰਹੇ ਹਨ।
ਸਕਾਰਾਤਮਕ ਰਹੋ ਅਤੇ ਉਮੀਦ ਬਣਾਏ ਰੱਖੋ (Stay positive and hopeful)
ਆਪਣੇ ਬੱਚਿਆਂ ਨਾਲ ਕਰੋਨਾਵਾਇਰਸ ਦੀ ਚਰਚਾ ਕਰਦੇ ਸਮੇਂ ਸਕਾਰਾਤਮਕ ਰਹਿਣਾ ਅਤੇ ਉਮੀਦ ਬਣਾਏ ਰੱਖਣਾ ਮਦਦਗਾਰ ਹੁੰਦਾ ਹੈ। ਮੀਡੀਆ ਅਕਸਰ ਚਿੰਤਾਜਨਕ ਅਤੇ ਨਕਾਰਾਤਮਕ ਪਹਿਲੂਆਂ ਤੇ ਧਿਆਨ ਦਿੰਦਾ ਹੈ, ਇਸਲਈ ਹੋ ਸਕਦਾ ਹੈ ਕਿ ਤੁਹਾਡੇ ਬੱਚੇ ਜ਼ਰੂਰਤ ਤੋਂ ਵੱਧ ਇਸ ਜਾਣਕਾਰੀ ਤੋਂ ਘਬਰਾ ਜਾਣ ਅਤੇ ਇਹ ਸੋਚਣ ਕਿ ਹਾਲਾਤ ਨਿਰਾਸ਼ਾਜਨਕ ਹਨ। ਉਨ੍ਹਾਂ ਨੂੰ ਇਹ ਦੱਸੋ ਕਿ ਬਹੁਤ ਸਾਰੇ ਡਾਕਟਰ ਅਤੇ ਵਿਗਿਆਨੀ ਵਾਇਰਸ ਦਾ ਪਤਾ ਲਗਾਉਣ ਬਾਰੇ ਸਖਤ ਮਿਹਨਤ ਕਰ ਰਹੇ ਹਨ, ਅਤੇ ਉਹ ਹਰ ਰੋਜ਼ ਨਵੀਆਂ ਚੀਜ਼ਾਂ ਸਿੱਖ ਰਹੇ ਹਨ। ਉਨ੍ਹਾਂ ਨੂੰ ਇਹ ਦੱਸੋ ਕਿ ਦੁਨੀਆ ਭਰ ਵਿੱਚ ਕਈ ਲੋਕ ਕਰੋਨਾਵਾਇਰਸ ਤੋਂ ਰਿਕਵਰ ਕਰ (ਠੀਕ ਹੋ) ਚੁੱਕੇ ਹਨ। ਉਨ੍ਹਾਂ ਲਈ ਇਹ ਜਾਣਨਾ ਮਹਤਵਪੂਰਣ ਹੈ ਕਿ ਹਾਲਾਂਕਿ ਅੱਜੇ ਹਾਲਾਤ ਆਮ ਹਾਲਾਤਾਂ ਤੋਂ ਵੱਖ ਹਨ, ਅਤੇ ਹੋ ਸਕਦਾ ਹੈ ਕਿ ਕੁੱਝ ਸਮੇਂ ਲਈ ਇਹ ਮੁਸ਼ਕਲ ਬਣੇ ਰਹਿਣ, ਪਰ ਆਖਰਕਾਰ ਹਾਲਾਤ ਆਮ ਹੋ ਜਾਣਗੇ।
ਬੱਚਿਆਂ ਨੂੰ ਮੀਡੀਆ ਤੋਂ ਮਿਲਣ ਵਾਲੀ ਜਾਣਕਾਰੀ ਨੂੰ ਸੀਮਿਤ ਰੱਖੋ (Limit information children get through the media)
ਕਰੋਨਾਵਾਇਰਸ ਬਾਰੇ ਮੀਡੀਆ ਵਿੱਚ ਬਹੁਤ ਜਾਣਕਾਰੀ ਮੌਜੂਦ ਹੈ ਅਤੇ ਇਹ ਸੰਭਾਵਨਾ ਹੈ ਕਿ ਤੁਹਾਡੇ ਬੱਚੇ ਟੀ.ਵੀ., ਰੇਡੀਓ ਅਤੇ ਆਨਲਾਇਨ ਤਰੀਕੇ ਰਾਹੀਂ ਇਸ ਜਾਣਕਾਰੀ ਨੂੰ ਵੇਖ ਅਤੇ ਸੁਣ ਰਹੇ ਹੋਣਗੇ। ਤੁਹਾਡਾ ਬੱਚਾ ਇਸ ਬਾਰੇ ਕਿੰਨੀਆਂ ਖਬਰਾਂ ਵੇਖਦਾ, ਸੁਣਦਾ ਅਤੇ ਪੜ੍ਹਦਾ ਹੈ, ਉਸਨੂੰ ਸੀਮਿਤ ਕਰਨ ਦੀ ਕੋਸ਼ਿਸ਼ ਕਰੋ, ਇਸ ਵਿੱਚ ਸ਼ੋਸ਼ਲ ਮੀਡੀਆ ਵੀ ਸ਼ਾਮਿਲ ਹੈ। ਕਰੋਨਾਵਾਇਰਸ ਨਾਲ ਜੁੜ੍ਹੀਆਂ ਗ੍ਰਾਫਿਕ ਤਸਵੀਰਾਂ ਵੇਖਣ ਜਾਂ ਇਸਦੀਆਂ ਵੱਧ ਰਹੀਆਂ ਸੰਖਿਆਵਾਂ ਬਾਰੇ ਪੜ੍ਹਣ ਕਰਕੇ ਵੀ ਘਬਰਾਹਟ ਅਤੇ ਨਿਰਾਸ਼ਾ ਪੈਦਾ ਹੋ ਸਕਦੀ ਹੈ। ਇਹ ਖਾਸ ਕਰਕੇ ਮਹਤਵਪੂਰਣ ਹੈ ਕਿ ਤੁਸੀਂ ਖਬਰਾਂ ਜਾਂ ਆਨਲਾਇਨ ਸਾਧਨ ਰਾਹੀਂ ਡਰਾਉਣ ਵਾਲੀ ਸਮੱਗਰੀ ਤਕ ਆਪਣੇ ਬੱਚੇ ਦੀ ਪਹੁੰਚ ਨੂੰ ਸੀਮਿਤ ਕਰਨ ਦੀ ਕੋਸ਼ਿਸ਼ ਕਰੋ।
ਉਨ੍ਹਾਂ ਗੱਲਾਂ ਤੇ ਧਿਆਨ ਦਿਓ ਜਿਹੜੇ ਬੱਚੇ ਆਪਣੇ ਆਪ ਨਿਯੰਤਰਿਤ ਕਰ ਸਕਦੇ ਹਨ (Focus on the things children can control)
ਸਾਨੂੰ ਬੱਚਿਆਂ ਨੂੰ ਉਨ੍ਹਾਂ ਗੱਲਾਂ ਤੇ ਧਿਆਨ ਦਵਾਉਣ ਵਿੱਚ ਮਦਦ ਕਰਨ ਦੀ ਲੋੜ ਹੈ ਜਿਹੜੀਆਂ ਉਹ ਸੁਰੱਖਿਅਤ ਅਤੇ ਸਿਹਤਮੰਦ ਰਹਿਣ ਲਈ ਕਰ ਸਕਦੇ ਹਨ। ਬੱਚਿਆਂ ਨੂੰ ਅਜਿਹੇ ਅਭਿਆਸਕ ਕੰਮ ਦੇਣ ਨਾਲ ਜਿਹੜੇ ਕੀ ਉਹ ਕਰ ਸਕਦੇ ਹਨ, ਉਹ ਬੇਵੱਸ ਮਹਿਸੂਸ ਕਰਨ ਦੀ ਬਜਾਏ ਬਲਵਾਨ ਮਹਿਸੂਸ ਕਰਨਗੇ। ਬੱਚਿਆਂ ਨੂੰ ਹੱਥਾਂ ਦੀ ਸਾਫ-ਸਫਾਈ ਬਾਰੇ ਯਾਦ ਕਰਾਓ – ਇਹ ਯਕੀਨੀ ਬਣਾਓ ਕਿ ਉਨ੍ਹਾਂ ਨੂੰ ਇਹ ਪਤਾ ਹੈ ਕਿ ਆਪਣੇ ਹੱਥਾਂ ਦੀ ਸਾਫ-ਸਫਾਈ ਕਿਵੇਂ ਕਰਨੀ ਹੈ ਅਤੇ ਉਨ੍ਹਾਂ ਨੂੰ ਇਹ ਯਾਦ ਦਿਲਾਓ ਕਿ ਉਹ ਖਾਣਾ ਖਾਣ ਤੋਂ ਪਹਿਲਾਂ ਅਤੇ ਇਸਦੇ ਬਾਅਦ, ਨਾਲ ਹੀ ਆਪਣੇ ਚਿਹਰੇ ਤੇ ਹੱਥ ਲਾਉਣ ਤੋਂ ਬਾਅਦ ਜਾਂ ਆਪਣਾ ਨੱਕ ਸਾਫ ਕਰਨ ਤੋਂ ਬਾਅਦ ਇਹ ਕਰਨ। ਉਨ੍ਹਾਂ ਨੂੰ ਸਿੱਖਾਓ ਕਿ ਖੰਘਣ ਜਾਂ ਛਿੱਕ ਮਾਰਨ ਸਮੇਂ ਆਪਣੀ ਕੋਹਣੀ ਦੀ ਵਰਤੋਂ ਕਿਵੇਂ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਯਾਦ ਕਰਾਓ ਕਿ ਉਨ੍ਹਾਂ ਨੂੰ ਆਪਣੀਆਂ ਅੱਖਾਂ, ਨੱਕ ਅਤੇ ਮੂੰਹ ਤੇ ਹੱਥ ਲਾਉਣ ਤੋਂ ਪਰਹੇਜ ਕਰਨਾ ਚਾਹੀਦਾ ਹੈ। ਜਿੱਥੇ ਸੰਭਵ ਹੋਵੇ, ਭੀੜ-ਭਾੜ ਤੋਂ ਬੱਚਣਾ ਚਾਹੀਦਾ ਹੈ ਅਤੇ ਲੋਕਾਂ ਨੂੰ ਆਪਣੇ ਘਰ-ਪਰਿਵਾਰ ਦੇ ਸਦੱਸਾਂ ਤੋਂ ਇਲਾਵਾ ਦੂਜੇ ਲੋਕਾਂ ਨਾਲ ਕਰੀਬੀ ਸਰੀਰਕ ਸੰਪਰਕ ਤੋਂ ਬੱਚਣਾ ਚਾਹੀਦਾ ਹੈ। ਬੱਚਿਆਂ ਨੂੰ ਦੱਸੋ ਕਿ ਇੱਕ-ਦੂਜੇ ਨਾਲ ਬਿਨਾਂ ਹੱਥ ਮਿਲਾਏ ਕਿਵੇਂ ਮਿਲਵਰਤਣ ਕਰਨੀ ਹੈ ਜਿਵੇਂ ਕਿ ਸਤਿ ਸ਼੍ਰੀ ਅਕਾਲ ਜਾਂ ਨਮਸਤੇ ਕਰਕੇ ਜਾਂ ਫਿਰ ਇੱਕ-ਦੂਜੇ ਨਾਲ ਕੋਹਣੀਆਂ ਜਾਂ ਪੈਰ ਟਕਰਾ ਕੇ।
ਸ਼ਰੀਰਕ ਗਤੀਵਿਧੀ ਕਰਕੇ, ਸਿਹਤਮੰਦ ਖੁਰਾਕ ਦੀ ਵਰਤੋਂ ਕਰਕੇ ਅਤੇ ਚੰਗਾ ਸੋ ਕੇ ਸਿਹਤਮੰਦ ਰਹਿਣਾ ਵੀ ਅਸਲ ਵਿੱਚ ਆਪਣੇ ਬੱਚਿਆਂ ਦੀ ਸਹਾਇਤਾ ਕਰਨ ਦੇ ਮਤਹਵਪੂਰਣ ਤਰੀਕੇ ਹੁੰਦੇ ਹਨ। ਬਹੁਤ ਸਾਰੇ ਬੱਚੇ ਇਸ ਗੱਲ ਤੋਂ ਨਿਰਾਸ਼ ਹਨ ਕਿ ਉਨ੍ਹਾਂ ਦੀਆਂ ਨਿਯਮਿਤ ਖੇਡਕੂਦ ਅਤੇ ਹੋਰ ਗਤੀਵਿਧੀਆਂ ਵੀ ਰੱਦ ਹੋ ਜਾਣਗੀਆਂ। ਆਪਣੇ ਬੱਚਿਆਂ ਨੂੰ ਐਕਟਿਵ (ਕ੍ਰਿਆਸ਼ੀਲ) ਰੱਖਣ ਦੇ ਹੋਰ ਤਰੀਕੇ ਖੋਜੋ, ਜਿਵੇਂ ਕਿ ਬੈਕਯਾਰਡ ਵਿੱਚ ਸਮਾਂ ਬਿਤਾਉਣਾ ਜਾਂ ਪਰਿਵਾਰ ਨਾਲ ਇੱਕਠੇ ਸੈਰ ਕਰਨ, ਨੱਠਣ-ਭੱਜਣ ਜਾਂ ਸਾਇਕਲ ਚਲਾਉਣ ਜਾਣਾ।
ਜਿੱਥੇ ਸੰਭਵ ਹੋਵੇ ਇੱਕ ਰੂਟੀਨ ਬਣਾਓ ਅਤੇ ਉਸਦੀ ਪਾਲਨਾ ਕਰੋ (Stick to routines where possible)
ਇਨ੍ਹਾਂ ਅਨਿਸ਼ਚਿਤ ਅਤੇ ਗੈਰ-ਅਨੁਮਾਨਯੋਗ ਮਿਆਦਾਂ ਦੌਰਾਨ ਬੱਚਿਆਂ ਨੂੰ ਪਹਿਲਾਂ ਤੋਂ ਕਿੱਤੇ ਵੱਧ ਇੱਕ ਰੂਟੀਨ ਦੀ ਲੋੜ ਹੁੰਦੀ ਹੈ। ਘਰ ਅਤੇ ਰੋਜ਼ ਦੇ ਜੀਵਨ ਵਿੱਚ ਜਿੰਨੀ ਸਧਾਰਣਤਾ ਹੋ ਸਕੇ, ਬਣਾਏ ਰੱਖੋ ਅਤੇ ਇਸ ਵਿੱਚ ਪਰਿਵਾਰ ਨਾਲ ਇੱਕਠੇ ਮਿੱਲਕੇ ਬਿਤਾਇਆ ਜਾਣ ਵਾਲਾ ਸਮਾਂ ਸ਼ਾਮਿਲ ਕਰੋ। ਤੁਸੀਂ ਭੋਜਨ ਕਰਨ ਅਤੇ ਸੋਣ ਦੇ ਸਮੇਂ, ਨਾਲ ਹੀ ਵੱਡੇ ਬੱਚਿਆਂ ਲਈ ਸਿੱਖਲਾਈ ਦੀਆਂ ਆਨਲਾਇਨ ਗਤੀਵਿਧੀਆਂ ਦੇ ਆਲੇ-ਦੁਆਲੇ ਆਪਣੇ ਬੱਚੇ ਦੀ ਰੂਟੀਨ ਬਣਾ ਸਕਦੇ ਹੋ। ਦਿਨ ਵਿੱਚ ਕੁੱਝ ਸ਼ਰੀਰਕ ਗਤੀਵਿਧੀ ਨੂੰ ਸ਼ਾਮਿਲ ਕਰਨ ਦੀ ਵੀ ਕੋਸ਼ਿਸ਼ ਕਰੋ, ਕਿਉਂਕਿ ਇਹ ਹਰ ਉਮਰ ਦੇ ਬੱਚਿਆਂ ਲਈ ਮਹਤਵਪੂਰਣ ਹੈ, ਅਤੇ ਬਾਲਗਾਂ ਲਈ ਵੀ ਵਧੀਆ ਹੈ।
ਆਪਣੇ ਬੱਚਿਆਂ ਨੂੰ ਵਿਖਾਓ ਕਿ ਤੁਸੀਂ ਸ਼ਾਂਤ ਰਹਿੰਦੇ ਹੋ (Show your children that you are calm)
ਬੱਚੇ ਆਪਣੇ ਮਾਪਿਆਂ ਅਤੇ ਦੇਖਰੇਖਕਰਤਾਵਾਂ ਵੱਲ ਇੱਕ ਗਾਈਡ ਦੇ ਤੌਰ ‘ਤੇ ਵੇਖਦੇ ਹਨ ਕਿ ਹਾਲਾਤਾਂ ਤੇ ਪ੍ਰਤੀਕ੍ਰਿਆ ਕਿਵੇਂ ਕਰਨੀ ਹੈ। ਇੱਥੋਂ ਤਕ ਕਿ ਬਹੁਤ ਛੋਟੇ ਬੱਚੇ ਵੀ ਬਾਲਗਾਂ ਵਿੱਚ ਤਣਾਅ ਅਤੇ ਬੇਚੈਨੀ ਪ੍ਰਤੀ ਸੰਵੇਦਨਸ਼ੀਲ ਹੁੰਦੇ ਹਨ। ਮਾਪਿਆਂ ਅਤੇ ਦੇਖਰੇਖਕਰਤਾਵਾਂ ਲਈ ਇਹ ਜ਼ਰੂਰੀ ਹੈ ਕਿ ਉਹ ਆਪਣੇ ਬੱਚਿਆਂ ਨੂੰ ਸ਼ਾਂਤ ਬਣਾਏ ਰੱਖਣ ਵਿੱਚ ਮਦਦ ਦੇਣ ਲਈ ਆਪਣੀਆਂ ਭਾਵਨਾਵਾਂ ਅਤੇ ਬੇਚੇਨੀ ਦਾ ਪ੍ਰਬੰਧ ਕਰਨ। ਜਦੋਂ ਤੁਸੀਂ ਬਹੁਤ ਤਣਾਅਗ੍ਰਸਤ ਜਾਂ ਘਬਰਾਏ ਹੋਏ ਮਹਿਸੂਸ ਕਰ ਰਹੇ ਹੋ, ਤਾਂ ਆਪਣੇ ਬੱਚਿਆਂ ਨਾਲ ਕਰੋਨਾਵਾਇਰਸ ਬਾਰੇ ਗੱਲਬਾਤ ਨਾ ਕਰਨ ਦੀ ਕੋਸ਼ਿਸ਼ ਕਰੋ। ਤੁਸੀਂ ਆਪਣੇ ਪਾਰਟਨਰ ਜਾਂ ਕਿਸੇ ਹੋਰ ਭਰੋਸੇਯੋਗ ਬਾਲਗ ਨੂੰ ਉਨ੍ਹਾਂ ਨਾਲ ਗੱਲਬਾਤ ਕਰਨ ਲਈ ਕਹਿ ਸਕਦੇ ਹੋ।
ਆਪਣੇ ਬੱਚਿਆਂ ਵਿੱਚ ਬੇਚੈਨੀ ਜਾਂ ਤਣਾਅ ਦੇ ਸੰਕੇਤਾਂ ਤੇ ਨਜ਼ਰ ਬਣਾਏ ਰੱਖੋ (Look out for signs of anxiety or stress in your children)
ਤਣਾਅਪੂਰਣ ਸਥਿਤੀਆਂ ‘ਤੇ ਹਰ ਕੋਈ ਵੱਖ-ਵੱਖ ਤਰੀਕੇ ਨਾਲ ਪ੍ਰਤੀਕ੍ਰਿਆ ਕਰਦਾ ਹੈ। ਕੁੱਝ ਬੱਚੇ ਸੁਭਾਵਿਕ ਤੌਰ ‘ਤੇ ਹੋਰ ਬੱਚਿਆਂ ਦੀ ਤੁਲਨਾ ਵਿੱਚ ਵੱਧ ਬੇਚੈਨੀ ਮਹਿਸੂਸ ਕਰਦੇ ਹਨ, ਅਤੇ ਹੋ ਸਕਦਾ ਹੈ ਕਿ ਕਰੋਨਾਵਾਇਰਸ ਉਨ੍ਹਾਂ ਤੇ ਬਹੁਤ ਅਸਰ ਪਾਵੇ। ਹੋ ਸਕਦਾ ਹੈ ਕਿ ਛੋਟੇ ਬੱਚੇ ਵਿਹਾਰ ਵਿੱਚ ਤਬਦੀਲੀ, ਵੱਧ ਭਾਵਨਾਤਮਕ ਹੋਣਾ, ਗੁੱਸਾ ਕਰਕੇ ਨੱਖਰਾ ਵਿਖਾਉਣ ਜਾਂ ਸੋਣ ਜਾਂ ਖਾਣ-ਪੀਣ ਵਿੱਚ ਮੁਸ਼ਕਲ ਆਉਣ ਵਰਗੇ ਸੰਕੇਤ ਦਰਸਾਉਣ। ਵੱਡੇ ਬੱਚਿਆਂ ਵਿੱਚ ਵੀ ਇਹ ਸੰਕੇਤ ਵੇਖੇ ਜਾ ਸਕਦੇ ਹਨ ਜਾਂ ਹੋ ਸਕਦਾ ਹੈ ਕਿ ਉਨ੍ਹਾਂ ਦਾ ਧਿਆਨ ਭਟਕਿਆ ਹੋਇਆ ਮਹਿਸੂਸ ਹੋਵੇ, ਉਨ੍ਹਾਂ ਨੂੰ ਧਿਆਨ ਲਗਾਉਣ ਵਿੱਚ ਮੁਸ਼ਕਲ ਹੋਵੇ ਜਾਂ ਉਹ ਚੀਜ਼ਾਂ ਭੁੱਲ ਜਾਣ। ਕੁੱਝ ਬੱਚੇ ਇੱਕ ਹੀ ਗੱਲ ਵਾਰ-ਵਾਰ ਕਰਨ ਵਾਲਾ ਜਾਂ ਸਨਕੀ ਵਿਹਾਰ ਕਰ ਸਕਦੇ ਹਨ, ਜਿਵੇਂ ਕਿ ਕੀਟਾਣੂਆਂ ਜਾਂ ਲਾਗ ਨੂੰ ਲੈ ਕੇ ਲੋੜ ਤੋਂ ਜਿਆਦਾ ਡਰ ਹੋਣਾ।
ਇਹ ਯਕੀਨੀ ਬਣਾਓ ਕਿ ਤੁਸੀਂ ਆਪਣੇ ਬੱਚਿਆਂ ਨਾਲ COVID-19 ਤੋਂ ਇਲਾਵਾ ਹੋਰ ਗੱਲਬਾਤਾਂ ਕਰਨੀਆਂ ਜਾਰੀ ਰੱਖਦੇ ਹੋ। ਆਪਣੇ ਬੱਚੇ ਨਾਲ ਬੈਠ ਕੇ ਗੱਲ ਕਰਨ ਅਤੇ ਉਨ੍ਹਾਂ ਨੂੰ ਕੀ ਚਿੰਤਾ ਹੈ ਇਹ ਸੁਣਨ ਲਈ ਸਮਾਂ ਕੱਢੋ। ਜੇਕਰ ਤੁਹਾਨੂੰ ਇਹ ਚਿੰਤਾ ਹੈ ਕਿ ਤੁਹਾਡੇ ਬੱਚੇ ਵਿੱਚ ਬੇਚੈਨੀ ਜਾਂ ਤਣਾਅ ਦੇ ਵਧੇਰੇ ਪੱਧਰ ਵਿਖਾਈ ਦੇ ਰਹੇ ਹਨ, ਤਾਂ ਆਪਣੇ GP (ਡਾਕਟਰ) ਤੋਂ ਸਲਾਹ ਲਓ।
ਆਪਣਾ ਖਿਆਲ ਵੀ ਰੱਖੋ (Look after yourself too)
ਅਨਿਸ਼ਚਿਤ ਅਤੇ ਤਣਾਅਪੂਣ ਸਮੇਂ ਪਰਿਵਾਰਕ ਰਿਸ਼ਤਿਆਂ ਤੇ ਬਹੁਤ ਦਬਾਅ ਪਾ ਸਕਦੇ ਹਨ। ਬੱਚਿਆਂ ਦਾ ਸਰਬੋਤਮ ਤਰੀਕੇ ਨਾਲ ਸਮਰਥਨ ਕਰਨ ਲਈ, ਇਹ ਮਹਤਹਪੂਰਣ ਹੈ ਕਿ ਇਸ ਬਹੁਤ ਤਣਾਅਪੂਰਣ ਅਤੇ ਔਖੇ ਸਮੇਂ ਵਿੱਚ ਮਾਪੇ ਆਪਣਾ ਵੀ ਖਿਆਲ ਰੱਖਣ। ਲੋੜੀਂਦਾ ਆਰਾਮ ਕਰਨ ਅਤੇ ਆਪਣਾ ਖਿਆਲ ਰੱਖਣ ਲਈ ਸਮਾਂ ਕੱਢਣ ਦੀ ਕੋਸ਼ਿਸ਼ ਕਰੋ। ਜੇਕਰ ਤੁਸੀਂ ਬਹੁਤ ਤਣਾਅਪੂਰਣ, ਘਬਰਾਏ ਹੋਏ ਜਾਂ ਅਸੁਰੱਖਿਅਤ ਮਹਿਸੂਸ ਕਰ ਰਹੇ ਹੋ ਜਾਂ ਤੁਸੀਂ ਉਸ ਤਰੀਕੇ ਨਾਲ ਆਪਣੇ ਬੱਚਿਆਂ ਦਾ ਸਮਰਥਨ ਨਹੀਂ ਕਰ ਪਾ ਰਹੇ ਹੋ ਜਿਸ ਤਰੀਕੇ ਨਾਲ ਤੁਸੀਂ ਇਹ ਕਰਨਾ ਚਾਹੁੰਦੇ ਹੋ, ਤਾਂ ਕ੍ਰਿਪਾ ਕਰਕੇ ਆਪਣੇ ਪਰਿਵਾਰ ਦੇ ਸਦੱਸਾਂ ਅਤੇ ਦੋਸਤਾਂ ਜਾਂ ਆਪਣੇ GP (ਡਾਕਟਰ) ਨਾਲ ਗੱਲਬਾਤ ਕਰੋ।
ਯਾਦ ਰੱਖਣ ਵਾਲੀਆਂ ਮੁੱਖ ਗੱਲਾਂ (Key points to remember)
- ਬੱਚੇ ਬਾਲਗਾਂ ਨੂੰ ਇੱਕ ਗਾਈਡ ਦੇ ਤੌਰ ‘ਤੇ ਵੇਖਦੇ ਹਨ ਕਿ ਤਣਾਅਪੂਰਣ ਹਾਲਾਤਾਂ ਵਿੱਚ ਕਿਵੇਂ ਪ੍ਰਤੀਕ੍ਰਿਆ ਕਰਨੀ ਹੈ
- ਆਪਣੇ ਬੱਚੇ ਨਾਲ ਕਰੋਨਾਵਾਇਰਸ ਬਾਰੇ ਗੱਲਬਾਤ ਕਰਦੇ ਸਮੇਂ ਸ਼ਾਂਤ, ਸਕਾਰਾਤਮਕ ਰਹੋ ਅਤੇ ਉਮੀਦ ਬਣਾਏ ਰੱਖੋ
- ਜਾਣਕਾਰੀ ਨੂੰ ਸਪੱਸ਼ਟ, ਸੱਚੀ ਅਤੇ ਉਮਰ-ਮੁਤਾਬਕ ਰੱਖੋ
- ਕਰੋਨਾਵਾਇਰਸ ਬਾਰੇ ਮੀਡੀਆ ਤੋਂ ਮਿਲਣ ਵਾਲੀ ਜਾਣਕਾਰੀ ਨੂੰ ਸੀਮਿਤ ਰੱਖੋ
- ਬੱਚਿਆਂ ਨੂੰ ਅਭਿਆਸਕ ਕੰਮ ਕਰਨ ਲਈ ਦਿਓ, ਜਿਵੇਂ ਕਿ ਹੱਥਾਂ ਦੀ ਚੰਗੀ ਸਾਫ-ਸਫਾਈ, ਤਾਂਜੋ ਉਨ੍ਹਾਂ ਨੂੰ ਲੱਗੇ ਉਹ ਇਹ ਕੰਮ ਆਪ ਕਰ ਸਕਦੇ ਹਨ
- ਯਕੀਨੀ ਬਣਾਓ ਕਿ ਤੁਸੀਂ ਅਤੇ ਤੁਹਾਡਾ ਬੱਚਾ ਸ਼ਰੀਰਕ ਤੌਰ ‘ਤੇ ਕ੍ਰਿਆਸ਼ੀਲ ਰਹਿੰਦੇ ਹਨ
- ਜੇਕਰ ਤੁਸੀਂ ਜਾਂ ਤੁਹਾਡਾ ਬੱਚਾ ਘਬਰਾਏ ਹੋਏ ਜਾਂ ਤਣਾਅਪੂਰਣ ਮਹਿਸੂਸ ਕਰਦੇ ਹੋ ਤਾਂ ਦੋਸਤਾਂ, ਪਰਿਵਾਰ ਜਾਂ ਆਪਣੇ GP (ਡਾਕਟਰ) ਤੋਂ ਮਦਦ ਲਓ
- ਆਪਣੇ ਬੱਚੇ ਦੇ ਸਵਾਲਾਂ ਦਾ ਜਵਾਬ ਦੇਣ ਲਈ ਅਤੇ ਸੰਚਾਰ ਸਾਧਨਾਂ ਨੂੰ ਖੁੱਲ੍ਹਾ ਰੱਖਣ ਲਈ ਸਮਾਂ ਕੱਢੋ
ਸਾਡੇ ਡਾਕਟਰਾਂ ਤੋਂ ਪੁੱਛੋ ਜਾਣ ਵਾਲੇ ਆਮ ਸਵਾਲ (Common questions our doctors are asked)
ਮੇਰੇ ਬੱਚੇ ਨੂੰ ਇਹ ਚਿੰਤਾ ਹੈ ਕਿ ਉਸਦੇ ਦਾਦਾ-ਦਾਦੀ ਜਾਂ ਨਾਨਾ-ਨਾਨੀ ਕਰੋਨਾਵਾਇਰਸ ਤੋਂ ਬਹੁਤ ਬੀਮਾਰ ਪੈ ਸਕਦੇ ਹਨ ਜਾਂ ਇਸ ਕਰਕੇ ਉਨ੍ਹਾਂ ਦਾ ਦਿਹਾਂਤ ਹੋ ਸਕਦਾ ਹੈ। ਮੈਨੂੰ ਉਨ੍ਹਾਂ ਨੂੰ ਕੀ ਕਹਿਣਾ ਚਾਹੀਦਾ ਹੈ?
ਇਮਾਨਦਾਰ ਰਹਿਣਾ ਪਰ ਨਾਲ ਹੀ ਉਮੀਦ ਬਣਾਏ ਰੱਖਣਾ ਅਤੇ ਸਕਾਰਾਤਮਕ ਰਹਿਣਾ ਮਹੱਤਵਪੂਰਣ ਹੁੰਦਾ ਹੈ। ਆਪਣੇ ਬੱਚੇ ਨੂੰ ਇਹ ਦੱਸੋ ਕਿ ਸਮਾਜਕ ਦੂਰੀ ਅਤੇ ਹੱਥਾਂ ਦੀ ਸਾਫ-ਸਫਾਈ ਵਰਗੇ ਕੰਮਾਂ ਨੂੰ ਅਮਲ ਵਿੱਚ ਲਿਆਉਣ ਨਾਲ ਬਜ਼ੁਰਗ ਰਿਸ਼ਤੇਦਾਰਾਂ ਨੂੰ ਵਾਇਰਸ ਦੀ ਚਪੇਟ ਵਿੱਚ ਆਉਣ ਤੋਂ ਸੁਰੱਖਿਅਤ ਰਹਿਣ ਵਿੱਚ ਮਦਦ ਮਿਲ ਸਕਦੀ ਹੈ। ਉਨ੍ਹਾਂ ਨੂੰ ਇਹ ਵੀ ਦੱਸੋ ਕਿ ਇੱਥੇ ਆਸਟ੍ਰੇਲੀਆ ਵਿੱਚ ਸਾਡੇ ਬਹੁਤ ਵਧੀਆ ਹਸਪਤਾਲ ਹਨ, ਜਿੱਥੇ ਲੋਕਾਂ ਦੇ ਬੀਮਾਰ ਪੈਣ ਦੀ ਸਥਿਤੀ ਵਿੱਚ ਬਹੁਤ ਸਾਰੇ ਡਾਕਟਰ ਅਤੇ ਨਰਸਾਂ ਉਨ੍ਹਾਂ ਦਾ ਖਿਆਲ ਰੱਖਣ ਲਈ ਤਿਆਰ ਹਨ।
ਮੇਰਾ ਬੱਚਾ ਅੱਜੇ ਵੀ ਆਪਣੇ ਦੋਸਤਾਂ ਨੂੰ ਮਿਲਣਾ ਚਾਹੁੰਦਾ ਹੈ ਅਤੇ ਮੈਨੂੰ ਪੁੱਛਦਾ ਹੈ ਕਿ ਕੀ ਮੈਂ ਉਸਦੀ ਪਲੇ ਡੇਟ ਦਾ ਪ੍ਰਬੰਧ ਕਰ ਸਕਦਾ ਹਾਂ? ਮੈਨੂੰ ਕੀ ਕਰਨਾ ਚਾਹੀਦਾ ਹੈ?
ਆਪਣੇ ਬੱਚੇ ਨੂੰ ਇਹ ਦੱਸੋ ਕਿ ਕਰੋਨਾਵਾਇਰਸ ਦੇ ਫੈਲਾਵ ਨੂੰ ਰੋਕਣ ਦਾ ਇੱਕ ਤਰੀਕਾ ਜਿਸ ਵਿੱਚ ਅਸੀਂ ਸਾਰੇ ਮਦਦ ਦੇ ਸਕਦੇ ਹਾਂ, ਉਹ ਇਹ ਹੈ ਕਿ ਦੂਜੇ ਲੋਕਾਂ ਨਾਲ ਮਿਲ-ਵਰਤਣ ਵਿੱਚ ਘੱਟ ਸਮਾਂ ਬਿਤਾਉਣਾ। ਪਲੇ ਡੇਟ ਦੀ ਥਾਂ ਤੇ ਹੋਰ ਅਜਿਹੇ ਤਰੀਕਿਆਂ ਬਾਰੇ ਸੋਚੋ ਜਿਸ ਰਾਹੀਂ ਉਹ ਆਪਣੇ ਦੋਸਤਾਂ ਨਾਲ ਸਮਾਜਕ ਤੌਰ ‘ਤੇ ਸੰਪਰਕ ਸਥਾਪਿਤ ਕਰ ਸਕਦੇ ਹਨ, ਜਿਵੇਂ ਕਿ facetime ਕਰਕੇ, ਫੋਨ ਕਰਕੇ, ਜਾਂ ਚਿੱਠੀ ਲਿੱਖ ਕੇ। ਇਹ ਦੱਸੋ ਕਿ ਹਾਲਾਤ ਹਮੇਸ਼ਾ ਲਈ ਅਜਿਹੇ ਨਹੀਂ ਰਹਿਣਗੇ, ਅਤੇ ਹਾਲਾਤ ਆਖਰਕਾਰ ਫਿਰ ਤੋਂ ਸਧਾਰਣ ਹੋ ਜਾਣਗੇ।
ਮੇਰੇ ਬੱਚੇ ਨੇ ਖਬਰਾਂ ਵਿੱਚ ਸੁਣਿਆ ਹੈ ਕਿ ਲੋਕੀ ਮਰ ਰਹੇ ਹਨ ਅਤੇ ਉਸਨੂੰ ਇਹ ਚਿੰਤਾ ਹੈ ਕਿ ਅਜਿਹਾ ਉਨ੍ਹਾਂ ਨਾਲ ਵੀ ਹੋਵੇਗਾ? ਮੈਨੂੰ ਕੀ ਕਹਿਣਾ ਚਾਹੀਦਾ ਹੈ?
ਆਪਣੇ ਬੱਚੇ ਨੂੰ ਇਹ ਭਰੋਸਾ ਦਿਲਾਓ ਕਿ ਕਰੋਨਾਵਾਇਰਸ ਨਾਲ ਬੱਚੇ ਬਹੁਤ ਬੀਮਾਰ ਨਹੀਂ ਪੈਂਦੇ ਹਨ ਅਤੇ ਕਰੋਨਾਵਾਇਰਸ ਹੋਣ ਨਾਲ ਉਨ੍ਹਾਂ ਦਾ ਦਿਹਾਂਤ ਨਹੀਂ ਹੋਵੇਗਾ। ਜੇਕਰ ਉਨ੍ਹਾਂ ਨੁੰ ਕਰੋਨਾਵਾਇਰਸ ਹੁੰਦਾ ਹੈ, ਤਾਂ ਇਹ ਸੰਭਾਵਨਾ ਹੈ ਕਿ ਉਨ੍ਹਾਂ ਨੂੰ ਜ਼ੁਕਾਮ ਹੋਵੇ, ਅਤੇ ਜਿਸਦੇ ਲੱਛਣ ਉਹੀ ਹੋਣਗੇ ਜਿਸਦਾ ਸਾਮ੍ਹਣਾ ਉਨ੍ਹਾਂ ਨੇ ਪਹਿਲਾਂ ਕੀਤਾ ਹੋਵੇਗਾ, ਜਿਵੇਂ ਕਿ ਗਲੇ ਵਿੱਚ ਦਰਦ, ਨੱਕ ਵੱਗਣਾ, ਖੰਘ ਅਤੇ ਬੁਖਾਰ, ਅਤੇ ਹੋ ਸਕਦਾ ਹੈ ਕਿ ਉਹ ਇੱਕ ਹਫਤੇ ਜਾਂ ਇਸਦੇ ਕਰੀਬ ਦੀ ਮਿਆਦ ਵਿੱਚ ਠੀਕ ਹੋ ਜਾਣ।
The Royal Children's Hospital ਦੇ ਜਨਰਲ ਮੈਡੀਸਨ, ਸਾਈਕੋਲੋਜੀ, ਸੋਸ਼ਲ ਵਰਕ ਅਤੇ ਮੇਂਟਲ ਹੈਲਥ ਵਿਭਾਗਾਂ ਦੁਆਰਾ ਤਿਆਰ ਕੀਤਾ ਗਿਆ। ਅਸੀਂ RCH ਦੇ ਉਪਭੋਗਤਾਵਾਂ ਅਤੇ ਦੇਖਰੇਖਕਰਤਾਵਾਂ ਦੁਆਰਾ ਦਿੱਤੇ ਵਿਚਾਰਾਂ ਨੂੰ ਮਾਨਤਾ ਦਿੰਦੇ ਹਾਂ।a
ਮਾਰਚ 2020 ਵਿੱਚ ਸਮੀਖਿਆ ਕੀਤੀ ਗਈ।
Kids Health Info ਨੂੰ The Royal Children’s Hospital Foundation ਦੁਆਰਾ ਸਮਰਥਨ ਪ੍ਰਾਪਤ ਹੈ। ਦਾਨ ਕਰਨ ਲਈ,
www.rchfoundation.org.au ਵੈੱਬਸਾਈਟ ਤੇ ਜਾਓ।
ਐਪ
ਇਹ ਐਪ ਤੁਹਾਨੂੰ ਤਿੰਨ ਸੌ ਮੈਡੀਕਲ ਤੱਥ ਪੱਤਰਾਂ ਦੀ ਖੋਜ ਕਰਨ ਅਤੇ ਇਨ੍ਹਾਂ ਨੂੰ ਬ੍ਰਾਉਜ਼ ਕਰਨ ਅਤੇ ਆਫਲਾਇਨ ਰਹਿ ਕੇ ਕੰਮ ਕਰਨ ਯੋਗ ਬਣਾਏਗੀ।
ਬੇਦਾਅਵਾ
ਇਸ ਜਾਣਕਾਰੀ ਦਾ ਉਦੇਸ਼ ਆਪਣੇ ਡਾਕਟਰ ਜਾਂ ਸਿਹਤ-ਦੇਖਰੇਖ ਪੇਸ਼ੇਵਰ ਨਾਲ ਕੀਤੀ ਜਾਣ ਵਾਲੀ ਚਰਚਾ ਵਿੱਚ ਸਹਾਇਤਾ ਦੇਣਾ ਹੈ, ਨਾ ਕਿ ਉਸਦੀ ਥਾਂ ਲੈਣਾ। ਇਨ੍ਹਾਂ ਉਪਭੋਗਤਾ ਸਿਹਤ ਜਾਣਕਾਰੀ ਦੇ ਲੇਖਕਾਂ ਨੇ ਇਹ ਯਕੀਨੀ ਬਣਾਉਣ ਲਈ ਕਾਫੀ ਕੋਸ਼ਿਸ਼ ਕੀਤੀ ਹੈ ਕਿ ਜਾਣਕਾਰੀ ਸਹੀ ਹੈ, ਤਾਜੀ ਹੈ ਅਤੇ ਸਮਝਣ ਵਿੱਚ ਆਸਾਨ ਹੈ। The Royal Children's Hospital, Melbourne ਇਨ੍ਹਾਂ ਕਿਤਾਬਚਿਆਂ ਵਿੱਚ ਦਿੱਤੇ ਵੇਰਵਿਆਂ ਵਿੱਚ ਕਿਸੇ ਗਲਤੀ ਦੀ, ਗੁੰਮਰਾਹ ਕਰਨ ਵਾਲੀ ਸਮਝੀ ਜਾਣ ਵਾਲੀ ਜਾਣਕਾਰੀ ਦੀ, ਜਾਂ ਕਿਸੇ ਇਲਾਜ ਯੋਜਨਾ ਦੀ ਸਫਲਤਾ ਦੀ ਕੋਈ ਜੁੰਮ੍ਹੇਵਾਰੀ ਸਵੀਕਾਰ ਨਹੀਂ ਕਰਦਾ ਹੈ। ਇਨ੍ਹਾਂ ਕਿਤਾਬਚਿਆਂ ਵਿੱਚ ਸ਼ਾਮਿਲ ਜਾਣਕਾਰੀ ਨੂੰ ਨਿਯਮਿਤ ਤੌਰ ‘ਤੇ ਅਪਡੇਟ ਕੀਤਾ ਜਾਂਦਾ ਹੈ ਅਤੇ ਇਸਲਈ ਤੁਹਾਨੂੰ ਹਮੇਸ਼ਾ ਇਹ ਜਾਂਚ ਕਰਨੀ ਚਾਹੀਦੀ ਹੈ ਕਿ ਤੁਸੀਂ ਕਿਤਾਬਚੇ ਦੇ ਸਭ ਤੋਂ ਹਾਲ ਹੀ ਦੇ ਸੰਸਕਰਨ ਦਾ ਹਵਾਲਾ ਲੈ ਰਹੇ ਹੋ। ਇਹ ਯਕੀਨੀ ਬਣਾਉਣ ਦੀ ਜੁੰਮ੍ਹੇਵਾਰੀ ਤੁਹਾਡੀ, ਮਤਲਬ ਉਪਭੋਗਤਾ, ਦੀ ਹੈ ਕਿ ਤੁਸੀਂ ਉਪਭੋਗਤਾ ਸਿਹਤ ਜਾਣਕਾਰੀ ਕਿਤਾਬਚੇ ਦਾ ਸਭ ਤੋਂ ਹਾਲ ਦਾ ਸੰਸਕਰਨ ਡਾਉਨਲੋਡ ਕੀਤਾ ਹੈ।